- هل التطور حقيقة أم مجرد نظرية؟
- الطفرة والتكيّف.. يعني إيه؟
- يعني إيه “نوع” أصلًا؟
- ☑ تطوّر صغير.. تطوّر كبير.. !؟
- ليه قرد؟ فين الحلقة المفقودة؟
- إزاي بيعرفوا عمر الحفريات؟
- مش التطور سقط في الغرب؟
- هل التطور بيفسر أصل الحياة؟
- هل التطور ضد الله وضد الدين؟
يعني إيه تطور صغير (Micro-Evolution) وتطور كبير (Macro-Evolution)؟
أول حد استعمل المصطلحين دول كان عالم اسمه Yuri Filipchenko، وتم استعمالها للتمييز بين التطور داخل نفس النوع (واللي تم تسميته بالـMicroevolution) وبين التطور من نوع لنوع آخر أو لمستويات أكبر من مستوى النوع الواحد (واللي تم تسميته بالـMacroevolution).
التمييز دا كان معناه بالنسبة لفيليبتشينكو إن الآليات المعروفة بتفسر التطور الصغير بس (الآليات دي اللي هي الطفرات والانتخاب الطبيعي، والهجرة-Migration، والانجراف الچيني-Genetic Drift).
لكن كان التطور الكبير بالنسبة لفيليبتشينكو محتاج آلية تانية لتفسيره، وكان في بالفعل توجهات لتفسير التطور الكبير من خلال آليات أُخرى في الوقت دا، منها تفسير اسمه الـMutationism ودا كان بيفترض إن فيه طفرات بتحصل بشكل آخر ضخم (Macromutation) هي اللي بتأثر على تحول نوع لنوع آخر. كمان كان فيه فرضية الـOrthogenesis، واللي كان فيليبتشينكو بيميل ليها، وكان من أشهر مؤيديها الأب تيلارد دي شاردان اليسوعي، ويمكن هنا أخد البعض في الاعتقاد بأن الداروينية تفسر التطور الصغير لكن لا تفسر التطور الكبير، وبالتالي أخطأ دارون وشغله مش تمام.
إلا أن بظهور الـطرح الحديث Modern Synthesis بالشكل اللي عليه النهاردة، تم إبطال تمامًا كل الفرضيات والتفسيرات دي، لإنه في النهاية من خلال توحيد الداروينية بعلم الوراثة تم إثبات إن التطور الكبير بيحصل بنفس آليات التطور الصغير لكن على نطاق زمن أكبر بكتير جدًا.
فكر فيها بالشكل الآتي، اي عضو في الجسم، مهما كان معقد (حاجة زي العين مثلًا)، في النهاية تقدر تعمله تتبع تاريخي Tracing back للچينات بالظبط زي ما بتعمل للصفات الأقل تعقيدًا (حاجة زي لون البشرة مثلًا)، وبالتالي الفرق بين التطور الصغير والتطور الكبير هو فرق كمّي، مش فرق كيفي، ودا هو المعنى اللي بيتم استعمال المصطلحين دول بيه دلوقتي، إن التطور الصغير هو تطور على فترة زمنية قليلة (سنين أو ألاف السنين)، بينما التطور الكبير هو تطور برضو بنفس آليات التطور اللي إحنا عارفينها، لكن على فترة زمنية كبيرة (مئات الآلاف أو ملايين السنين).
أي كلام عن رصد التطور معمليًا هو بالتعريف كلام عن التطور الصغير، لكن دا مش معناه إن التطور الكبير مبيحصلش أو إن مفيش نوع بيتحول لنوع آخر، لا. هو بيحصل والأدلة عليه قوية جدًا ومفيش أي جهة علمية بتشكك فيها النهاردة، لكنه تعريفًا منقدرش نشوفه في المعمل، ولازم نؤكد تاني إن تعريفات النوع مش تعريفات موضوعية موجودة في الطبيعة لكنها تعريفات براجماتية-عملية بتفيد البحث العلمي.
وبالتالي لما تسمع حد بيقول إن التطور الصغير بس هو اللي تم إثباته، وهو اللي بيحصل، لكن التطور الكبير مبيحصلش، تعرف على طول إنه متعلمش أي حاجة عن التطور، وإنه مش فاهم أصلًا يعني إيه تطور صغير وكبير أو يعني إيه نوع وإيه مفهوم تنوع الكائنات الحية ومعندوش أي فكرة العلماء بيتعاملوا مع الموضوع دا والمفاهيم دي إزاي.