- أمدح في البتول
- يا م ر ي م
- ☑ آجيوس أوثي أوس، آجيّوس يس شيروس
- أمدح فيكي يا مختارة
مُجَرّد قراءة بس واعيه لِمَا نُرددَّهُ في مِثال واحد لمديحة من مَدايح كَيهك الأكثر شهرة، والتي تقال بعد الهوس الكيهكي مباشرة: مديحة آجيوس أوثي أوس، آجيّوس يس شيروس؛
إنك تفكّر وتتساءل، دي علامة إنك حي وموجود! وواحدة من أهم الأسئلة الوجودية إن في هامش الكُتب المطبوعة، مكتوب أن هذه المديحة قدمها المُعلم عبد السيد اقلاديوس طبل (“طبل” ده اسمه مش خطأ في الكتابة) مُعلم الكنيسة القبطية بأسيوط، وعوض أفندى سرور بطنط الجزيرة (و “طنط الجزيرة” دي قرية بمركز طوخ التابع لمحافظة القليوبية، مش خطأ في الكتابة برضو).
في حين إن عملها واحد اسمه يوحنا، من سمنود، وهى لا تراث ولا ليتورجي ولا ليها اى قيمة كَنَسيّة (وده مبدأيا يعنى).
عموماً، المعلم طبل اتقابل مع طنط الجزيرة، قصدي واحد أفندي من طنط الجزيرة، وأتحفونا بمديحة ملهاش أى علاقة ببعضها، ولا ليها أيّ هدف روحي، أهو أيّ كلام وخلاص نملأ بيه الوقت.
قدوس الله قدوس.. قدوس القوي قدوس..
قدوس الحي الله.. آمين هالليلويا..
كلام جميل، يالله بقى كمّل، شكلك يا معلم هتقول كلام زيّ الفُل.
بمعونة رب قدير.. إله عظيم خبير..
أشرح معنى تفسير.. آمين هالليلويا..
طيب اشرح يا سيدي، قول إيه تفسير آمين الليلويا.
معناه ياما أحلاه.. ليس غير الله إله..
نسبحه فوق أعلى سماه.. آمين هالليلويا..
فين يا معلم تفسير آمين الليلويا؟
مش وعدتني إنّك هتشرح معنى تفسير آمين الليلويا؟
ولا قصدك يعني إن معناه ياما أحلاه ليس غير الله اللي نسبحه فوق أعلى سماه، هي دي التفسير؟ ماااااشي
ميخائيل وغبريال.. روفائيل وسوريال..
يتلون تسابيح وأقوال.. آمين هالليلويا..
فين باقي أسماء السبع ملائكة؟ ولا كان على أيامهم ٤ بس ؟!
وبعدين نقل على الشاروبيم والسيرافيم والأربعة حيوانات!
الثالث شبه عقاب.. يسأل عن الطير بإيجاب..
أمام وحيد الآب.. آمين هالليلويا..
يعني إيه؟ إيجاب يعنى هو بيجاوب ولا قصدك بالإيجاب، يا عم الله يسترك رسّينا على بَر!
تسبحه الأفلاك.. الذين سلكوا الأسلاك..
من فوق أعلى السماوات.. آمين هالليلويا..
أيّ كلام وخلاص ملوش معنى! إيه الأفلاك الذين سلكوا الأسلاك من فوق أعلى السماوات؟ أيّ هتَش!
صطانائيل قد صار.. شيطانا بالاستكبار..
لمّا بطل ذا التذكار.. آمين هالليلويا..
أنا مش فاهم حاجه! هنمشيها أن سطانائيل ده اسم الشيطان قبل السقوط وتكبّر و صار شيطانًا، بس إيه لمّا بطل ذا التذكار؟
تذكار جاية من الذِكر يعني؟ ولا بيعمل تذكار الأربعين مثلا وبطلّه؟ مش مهم كلام ليه معنى ولا ملوش! المهم آمين الليلويا!
مسكين من يسمعها.. في حضرة يجمعها..
ولا يتلو معها.. آمين هالليلويا..
من يسمع إيه حضرتك؟ ما تقول قصدك على إيه؟
الليلويا يا تنزيه.. وقائلها يكفيه..
يقول ألفين بفيه.. آمين هالليلويا..
وتقول ٢٠٠٠ مرة هالليلويا، يا أكيد هايحصلك حاجه!!
اصلها تعويذه هيَّ!
سبحانه مكوّن ما كان.. كائن قبل الاكوان..
ما يخلو منّه مكان.. آمين هالليلويا..
وهنا المعلم قَلَب على الثقافة اللي حولنا تمامًا، وبدأ يستخدم نفس كلماتهم (٥ أبيات ورا بعض: سبحانه)
سبحانه جل ثناه.. خفي لا عين تراه..
ولا معبود سواه.. آمين هالليلويا..
سبحانه خلق من الماء.. نارا وأرضا صماء..
أوجدها من العدم.. آمين هالليلويا..
سبحانه رب غيور.. رؤوف رحيم غفور..
على كل فعل ساطور.. آمين هالليلويا..
سبحانه منشئ الأكوان.. بتدبيره قد كان..
إذ قال للشيء كن فكان.. آمين هالليلويا..
طبعًا فكر غير مسيحي بالمرّة،
لا عندنا معبود، بل الله المحبوب الآب السماوي.
ومفيش إن الله خلق من الماء.
وطبعا مفيش أسماء الله الحسنى، ولا يقول للشيء كن فيكون.
بأقوال كتاب الزابور.. الـ١٥١ مزمور..
وفي آخر كل مزمور.. آمين هالليلويا..
الزابور؟
طبعًا مفيش الكلام ده، وأتحداك ياللي بتقرا لو لقيت كلمة آمين هالليلويا في نهاية كل المزامير (الـ ١٥١)!
هيَّ جت مرة واحدة بس في نهاية مزمور ١٠٦، وفي بعض المزامير جاءت كلمة هللويا فقط.
تُقرأ سائر الأوقات.. إلى خالق السماوات..
وفي شرح الهوسات.. آمين هالليلويا..
يا معلم أرسى على حل، هتتقال كل الأوقات؟ وﻻ وفى شهر كيهك بس؟ ولا قصدك على إيه؟
وفجأة.. نقل الكلام عن العذراء مريم وشوية أوصاف..
وفجاه.. تقرر يخلّص المدينة اللي ملهاش علاقة ببعضها واحفظ البابا والأسقف..
وبعدها تحسّه قاعد في الفَسَحه (معلش بقى، القافية حكمت)
احفظ يا رب الأرباب.. سائر كل الأحباب..
الحضار والغياب.. آمين هالليلويا..
واحفظ قاريها.. والشارح لمعانيها..
والعامل بما فيها.. آمين هالليلويا..
وناظمها اغفر له.. خطاياه مع زلله..
وبرحمتك أنعم له.. آمين هالليلويا..
يوحنا من سمنود.. مسمي بها ومولود..
يا رب تحنن عليه.. آمين هالليلويا..
كل ده كلام مساطب، مش كلام لاهوتي يتصلى في الليتورجية.
المهم، أخيرًا جاب التايهة:
يُقرا مثل فاض قلبي.. قولًا حسنا مجلّي..
يتحقق بمراد ربّي.. آمين هالليلويا..
هو إيه اللي يقرأ مثل فاض قلبي؟ فهمت أنا كده!
مش عارف أقولك إيه، مش عارف من غير ما كنت قولت، كنت قريتها أزاي،
إلا قولي يا أخ، هو إيه فاض قلبي ده؟
إيه موقعه من الإعراب؟
وإيه قولا حسنًا مجلّي؟
وإيه يتحقق بمراد ربي؟
بقولك إيه، أنت فاهم أنت بتقول إيه؟!
يجاوبنا:
لساني تاق يتكلم.. بكلام ماهر يفهم..
بمراد من هو يَعلم.. آمين هالليلويا..
صدقني وأنا كمان، لساني طَق مش تاق بس، نفسي تقولوا كلام ماهر ويُفهم بجد؟
ومين مراد ده اللي هو يَعلم؟!
يا جدعان اللى يشوف مراد يقوله إني عاوزه، عشان تقريبًا هو الوحيد اللي فاهم يوحنا اللي من سمنود عاوز يقول إيه!
