من أكتر المفاهيم اللي اتلخبطت واتشوهت هو مفهوم الحب فاسمحوا لي نراجع مع بعض إيه هو الحب قبل ما نحتفل بيه؟
الحب هو عطاء لا ينتظر أي رد، أحب إنسان يعني أهتم أن هو يكون مرتاح، أفرح لأنه هو يكون سعيد، أقبل أنه يكون بيعمل اللي هو عاوزه وشايفه مريح ليه.
الحب مش علاقة، العلاقات لها مفاهيم تانية وبتقوم على الحب وأشياء أخرى، لكن لو أنا مستني مقابل للي بقدمه ما يبقاش حب لو محتاج مقابل ما يبقاش حب، لو عندي نقص مشاعر ومحتاج حد يملاها لي ده أخر ما يقال عنه أنه حب. والرغبة في شخص أو شيء ما ينفعش أقربها من مفهوم الحب، بالتالي الامتلاك أو الرغبة في امتلاك الآخر ليست حب.
الحب لا يسقط أبدا ولا ينتهي ولا يتغير لأنه مش مرتبط بحاجة ممكن تتغير حتى لو تحول الشخص اللي أنت بتحبه إلى عدو تقدر تفضل تحبه.
طيب الحب ده ييجى إزاي؟ ييجي من مصدر الحب الله الخالق لو ليك اتصال حقيقي بمصدر الحب تتملي أنت الاول وتدلدق على اللي حواليك، ودي أهم طريقة تتأكد بيها إنك بتحب لأن الحب فيض.
عارفين الكوباية اللي بتملى وتفيض عمرها ما تقول هي المياه الزيادة اللي أنا وقعتها راحت فين؟ الترابيزة ولا الأرض ولا الزرع ما رجعتليش شوية الميه اللي أنا دلقتها عليهم ليه؟ لكن فيض الحب ده يغير كل اللي يلمسه ينضف ويروي ويثمر فيه ويجمل كل اللي حواليه.
الفكرة أن في مفاهيم خطيرة اتسربت لنا وأحنا صغيرين ساهمت في التشويه ده، اعمل كده علشان ربنا يحبك، سوي كده علشان بابا وماما يحبوك ما تعملش كده علشان أحبك وده كله غلط كبير.
الحب مفيهوش علشان، الحب يعني أحبك زي ما أنت بعيوبك قبل ميزاتك، هو ده الحب الخام الأصلي زي كده الكاكاو الطبيعي قبل ما يتحط عليه اللبن والسكر علشان يبقى شوكولاتة.
كل عيد حب وأنتوا محبوبين ومحبين بالحب النقي الحقيقي القادر على تغيير الكون كله وإعادته إلى حالة الفردوس الأولى.
