في الوقت اللي فيه ناس بتتبرع بدمها مجانًا عشان تنقذ حياة غيرها، في مستشفيات بتاخده وتبيعه بآلاف الجنيهات بمنتهى الاستغلال والجشع!
كنا محتاجين كيس دم مفلتر ومشعشع لأم غالية عليّ مريضة كلى في العناية المركزة بشكل ضروري. من كام يوم واحنا بنلف على بنوك الدم المختلفة، لأجل كيس واحد بس!
اللي زاد صعوبة البحث مش بس فكرة نقص الدم (اللي واضح إن المشكلة مش في نقصه، قد ما هي في استغلال الناس له!)، لكن ردود الأفعال اللي شفناها من اللي شغالين في “المنظومة” سواء حكومية أو خاصة.
وصلنا أخيرًا لمستشفى شهيرة (اللي الاسم مالوش علاقة خالص ببنك الدم عندهم)، وهناك طلبوا منّا ٥ متبرعين عوضًا عن كيس الدم الواحد.
وطبعًا الكيس اللي هيدوهولنا ده مش مفلتر ولا مشعشع.
سألنا عن التكلفة؟
قالك الفلترة بـ1800 جنيه، والشعشعة بـ600 جنيه! وعرفت بعد شوية إن كيس الدم العادي عندهم بيتباع بـ1300 جنيه.
نشكر ربنا إنه في الآخر (أكيد بصلوات الناس اللي شملونا بمحبتهم وروحهم الطيبة)، قدرنا نوصل لكيس دم في بنك دم الدقي عن طريق وزارة الصحة. (اللي تواصلنا معاهم من بداية احتياجنا، وكل شوية يقولوا بندور بندور وهانكملكم، لكن لما طال الوقت بدون نتيجة والردود اللي كانت بتبين إن في حاجة غلط –أو حاجات– قدمنا شكوى رسمية، وبعدها الرد كان سريع، والتعامل محترم، والكيس اتوفّر فورًا). [بيدوَّر وهو عنده جوا]
العجيب بقى! الكيس هناك لاقيناه مفلتر ومشعشع بـ900 جنيه بس!
وهنا ظهر ملمح الفساد الحقيقي:
في المستشفى الشهير:
• 5 أكياس دم (1300 جنيه للكيس × 5 متبرعين) = 6500 جنيه
• تكلفة فلترة: 1800 جنيه
• تكلفة شعشعة: 600 جنيه
الإجمالي = 8900 جنيه لكيس واحد فقط!
في بنك دم الدقي:
• كيس دم مفلتر ومشعشع بـ900 جنيه فقط!
• فرق التكلفة = 8900 – 900 = 8000 جنيه!
• يعني الكيس في المستشفى دي أغلى بـ9 مرات تقريبًا من بنك الدم!
وبالمناسبة، دي مش المستشفى الوحيدة في رحلة بحثنا اللي طلبت ٥ متبرعين مقابل كيس دم! في مستشفيات تانية طلبت ٨ متبرعين!
يعني ده مش تصرف فردي… ما شاء الله دي حالة طبية مجتمعية منتشرة في البزنس الطبي، تجارة ولها قوانينها، ليها بياعينها، وطبعًا الطلب عليها كتير، ومافيش أغلى من حياة الإنسان ودمه عشان نكسب من وراه ونربح.
بنتعامل مع دم الناس كأنه وقود في السوق الحرة… كل ما الطلب يزيد، يرفعوا السعر، والبقاء للي يدفع أكثر.
ليه؟!
ليه اللي بنديهولكم طوعًا، وبمنتهى الرضا ومن غير مقابل وقت ما بتحتاجوه، بتبيعوه لينا بأغلى سعر ممكن أول ما نحتاجه؟!
ليه “المستشفى الشهير” اسم مش على مسمى؟!
يا تسلكوا بحسب الاسم ومعناه بأمانة، يا تغيّروا الاسم وتعيشوا حقيقتكم بصراحة!
سمّوا الأشياء بأسمائها الحقيقية، عشان الناس ما تتوهش، وعشان ما ننساش ليه أصلاً المفروض تكونوا موجودين!
اكسبوا، بس برحمة وعدل…
مش بجشع وطمع وجحدان، بمص دم الناس!
وسؤال لكل اللي هايكمل ويوصل لأخر المقال، ولأي مسؤول هايكون حظه يقرأ الكلام ده:
إزاي نوقف تجارة الدم؟
اللي هو أصلاً بيتقدم ببلاش من المتبرعين!!
ونخلي التبرع بالدم في إطاره اللي المفروض يكون عليه:
رحمة، مش مصلحة؟
عطاء، مش سبوبة؟
يبقى الدم للحياة، مش للتجارة!!
ولأني مش طبيب، فحبيت أتأكد من معلومة التبرع بالدم يوازي كام كيس دم… فدورت ولاقيت:
كل متبرع بالدم بيدي حوالي 450 مل = كيس دم واحد.
يعني ٥ متبرعين = ٥ أكياس دم.
فلو هناك معلومات فايتاني أو في الحسبة، سواء هي أزيد أو أقل، أرجو تنبيهي.
ومحتاج كمان أسمع المبررات، سواء كانت سليمة أو حتى مش مقنعة، ولو في زوايا أو وجهة نظر أنا مش شايفها، ياريت توضحوا لي عشان تكتمل عندي الصورة.
ولو حد قدر يوصل الرسالة دي لو تستاهل إنها توصل، يوصلها.
الدم للحياة مش للتجارة!
